Kaupapa Maori

Tēna koutou,
Kātahi anō māua ko taku hoa mahi a Harry ka mutu i to maua hui. Ko ia tēna e āwhina mai ana i a au ki te tuku whakaaro ki tēnei wāhi. Ko ia tēna e whakamārama ana i ngā momo āhuatanga o te tuku kōrero, o te whakapiri whakaahua, pūoro, hononga ipurangi hoki. He tangata rehe, he reiputa anō aku hoa mahi ki tēnei momo mahi, arā, te ringa raweke haere i ngā momo pumanwa rorohiko, i ngā mea katoa o te ao rorohiko, o te ao ipurangi hoki. Me taku waimarie anō e kaha ana nei rātou ki te āwhina, ki te whakautu i aku pātai - he pātai heahea i ētahi wā.
Hoi anō, i whakaritea te blog nei hei mea whakatakoto kōrero mo ngā āhuatanga e pā ana ki a mātou mahi ka tahi. Ka rua he wāhi anō kia whai wā mātou, te hunga ngoikore, penei i a au nei, ki te parakitihi, kia waia haere au ki tēnei huarahi. Mā te parakitihi ka tau ai ngā whakaaro, ka marama pai ai te tangata ki te mahi, ahakoa he aha te mahi.
Na reira ko au tēnei e parakitihi haere ana i ngā akoako i whakaputaina e taku hoa e Harry i te ata nei. Kāre he pikitia, he whakaahua rānei o tēnei kōrero. Ā tōna wā e hoa mā, ā tōna wā. E mahara ana au ki ngā kupu a kui mā, a koro mā, arā, ahakoa he iti he pounamu!
Kia tau iho ngā manaakitanga o te wāhi ngaro ki runga i a koutou katoa, ahakoa kai hea.

This entry was posted on Tuesday, September 18th, 2007 at 1:05 pm and is filed under pahupahu. You can follow any responses to this entry through the RSS 2.0 feed. You can leave a response, or trackback from your own site.